Ташкенттен Алма-атаға автобуслар қатнайды
“Ўзавтотранс” агентлиги Қазақстан инвестициялар ҳәм раўажланыў министрлигиниң транспорт комитети менен биргеликте «Ташкент-Алма-ата-Ташкент» халық аралық автобус жөнелисин ашыў бойынша таярлыққа киристи. Бул ҳаққында Өзбекстан автомобиль транспорты агентлигиниң Баспасөз хызмети
хабар берди.
Аралық 818 километрди, жол ушын кететуғын ўақыт болса 16 саат 30 минутты қурайды. “Ғишткўприк” яғный Чернявка (Өзбекстан) ҳәм «Жипек жолы» (Қазақстан) шегара ҳәм бажыхана қадағалаў пункти тексериўинен өтиў ушын 30 минуттан ўақыт кетеди.
Жол кирей ҳақы Өзбекстанда 100 мың сўм, Қазақстанда болса 4 мың теңге етип белгиленген.
«Ташкент-Алма-ата-Ташкент» халық аралық автобус жөнелисиниң ашылыўы бүгин, 11-апрель күни саат 16:00 де болып өтеди.
Турақлы қатнаўлар ертеңнен баслап «Ташкент» автовокзалынан күнине үш мәртеден әмелге асырылады. Автобуслар саат 16:00, 17:00, 18:00 де жолға шығады.
«Алма-ата-Ташкент» жөнелиси бойынша автобуслар қатнаўлары «Сайран» автовокзалынан әмелге асырылады.