Шымбайда жаңа кәрхана иске түсти
Жақында Шымбай районында өндирис кәрханасы иске түсип, онда халқымыздың күнделикли тутыныўы ушын күтә зәрүр болған кийим жуўыў унтағы, газ плита ҳәм ыдыс-табақларды тазалайтуғын өнимлер ислеп шығарылмақта. Бул жәмийеттиң баслығы өткен жылы Шымбай экономика колледжиниң финанс қәнигелигин табыслы тамамлаған Қолдасбаева Мырзахан. Ол «Агробанк»тың Шымбай филиалынан 100 млн. сумлық жеңиллетилген кредит алып, өнимлерди ислеп шығаратуғын керекли үскенелерди Қытай мәмлекетинен алып келди. Ал, шийки зат өнимлерин болса, Қоңырат Сода заводынан, қосылатуғын дәрилерин болса, Ташкенттеги «Фарэнергохиммашсавдо» жуўапкершилиги шекленген жәмийетинен алып келмекте.
-Дәслеп Ташкентли қәнигелер бизиң кәрханамызға келип, хызметкерлеримизге шийки заттан таяр өнимлер ислеп шығарыўды үйретип кетти,-дейди усы жәмийет баслығы. Ең тийкарғысы жәмийетте район турғынларынан жумыссыз жүрген 13 пуқараның бәнтлиги тәмийинленди. Солардың үшеўи колледж питкериўшиси, қалған 10 пуқара усы аймақ турғынлары.
Дерек: Шымбай районы ҳәкимлиги
