Шавкат Мирзиёев АҚШ пайтахтына жетип барды
Өзбекстан Республикасы Президенти Шавкат Мирзиёвтиң АҚШқа рәсмий сапары басланды. Президент самолёты Вашингтондағы «Эндрюс» аэропортына қонды. Шавкат Мирзиёевти АҚШ Мәмлекет департаменти басшылары ҳәм басқа рәсмийлер күтип алды.
Президент баспасөз хызметиниң берген рәсмий
мағлыўматларына қарағанда, Шавкат Мирзиёев 16-май күни Ақ үйде АҚШ Президенти Дональд Трамп пенен ушырасады. сөйлесиўлер алдын тар шеңберде, кейин кең шеңберде болып өтеди. Кең шеңбердеги сөйлесиўлерде Өзбекстан ҳәм АҚШ рәсмий делегациясы ўәкиллери қатнасады, сиясий, саўда-экономикалық, инвестициялық ҳәм басқа тараўлардағы шерикшиликти раўажлантырыў мәселелери сөйлесиледи.
16-май күни кеште Өзбекстан тәрепинен рәсмий қабыллаў мәресими өткериледи. Онда АҚШ администрациясы басшылары, министрлик ҳәм мәкемелер, ири компания ҳәм корпорациялар басшылары қатнасады.
Президент 17-май күни Пентагонға барып, АҚШ қорғаныў министри менен сөйлесиў өткереди. Капитолийда Конгрессменлер ҳәм сенаторлар менен ушырасып, мәмлекетлеримиз ортасындағы шерикшиликти ҳәр тәреплеме беккемлеў мәселелерин сөйлеседи.
Шавкат Мирзиёев Жәҳан банки Президенти менен де ушырасып, мәмлекетимиз экономикасына инвестиция тартыў бойынша сөйлеседи.