Өзбекстанда бензин баҳасы қаншаға қымбатлаўы ҳаққында
Өзбекстан Республикасы Министрлер Кабинетиниң «Жанылғы-энергетика ресурсларына баҳалар ҳәм тарифлердиң өзгериўи ҳаққында»ғы қарары жойбары ислеп шығылды (Kun.uz’дабар). Бул ҳаққындағы хабарлар социаллық тармақларда да кең тарқалды. Усыған муўапық, бензинге баҳалар көтерилиўи төмендегише жүз бериўи мүмкин:
Аи-80 - бир литр ушын 4000 сўм;
Аи-91 - бир литр ушын 4500 сўм;
Дизель жанылғысы - бир литр ушын 4800 сўм;
ЭКО дизель жанылғысы - бир литр ушын 4900 сўм.
Сондай-ақ, халықтың айрықша қатламы ушын автобензин сатып алыўға ҳәр айда 66 мың 700 сўм муғдарында компенсация төлениўи режелестирилген, деп жазады kun.uz.
Еслетип өтемиз, сонғы мәрте 2017-жыл 15-ноябрь күни Өзбекстанда бензин баҳасы 35%ке көтерилген еди.
Аи-80 маркалы автобензин — 1 литри 3800 сўм, Аи-91 маркалы автобензин — 1 литри 4300 сўм, Дизел жанылғысы — 1 литри 4100 сўм болған.
Буннан соң, 2018-жыл 15-февральда Өзбекстандағы бирден-бир монопол шөлкем “Ўзбекнефтгаз” АЖға қараслы автомобиллерге жанылға қуйыў шахапшаларында АИ-95 бензининиң баҳасы көтерилди.
Атап өтиў керек, бензинге баҳаларды көтериў ҳаққындағы қарар еле қабылланбаған. Бул бағдардағы өзгерислер қашан күшке кириўи де белгисиз болып турыпты.
