Нөкисте шебер аспазлар таңлаўы өткериледи
Жақын күнлерде пайтахтымызда улыўмахалықлық Наўрыз байрамына бағышланып «Аспазлар таңлаўы» жарысы болып өтеди. Бул ҳаққында Қарақалпақстан хабар агентлиги мәлим етти.
Таңлаўда қала ҳәм районлардағы ресторан, кафе ҳәм асханалардан 40қа шамалас аспаздың қатнасыўы күтилмекте.
Таңлаў қатнасыўшылары тәрепинен таярланған тағамларды Өзбекстан Аспазлар бирлеспеси, халықаралық аспазлық орайы, «Қарақалпақ улыўма аўқатланыў» кәрханалары бирлеспеси, санитария-эпидемиологиялық бақлаў орайы ўәкиллеринен ибарат төрешилер қурамы баҳалап барады. Илаж жуўмағында биринши, екинши, үшинши орын ийелери, сондай-ақ, номинациялар бойынша жеңимпазлар анықланып, шөлкемлестириўшилер тәрепинен сыйлықланады.
