Муғаллимлерге жеңилликли ипотека ҳәм автомобиль кредитлерин ажыратыў ушын арнаўлы фонд шөлкемлестириледи
Өзбекстан Республикасы халық билимлендириў министрлиги жанында тараў хызметшилерине жеңилликли кредитлер ажыратыў менен шуғылланатуғын арнаўлы фонд шөлкемлестирилиўи режелестирилген.
Буннан тысқары, фонд тараў хызметшилери ушын арзан үй-жай қурылысын қаржыландырыў менен де шуғылланады. Бул ҳаққында Президент қарары жойбарында келтирилген. Усынысты Халық билимлендириў министрлиги кириткен.
Қарарда айтылыўынша, фондты шөлкемлестириўден мақсет – билимлендириў тараўы хызметишлериниң турмыс жағдайын тәмийинлеў ҳәм жасаў шәраятларын жақсылаў. Сонлықтан фонд билимлендиў тараўы хызметшилерине ипотека, автомобиль ҳәм тутыныў кредитлерин береди.
Буннан тысқары, жаңа фонд Өзбекстанда кымбат баҳалы қағазлар базарын раўажландырыўға көмеклеседи. Фондтың тийкарғы мақсетлеринен бири – секюритизация менен шуғылланыў, яғный ипотека кредитлерине тийкарланған қымбат баҳалы қағазлар шығарып халыққа сатыў.
Фондтың устав капиталы 100 млн АҚШ долларына тең болады. Қосымша қаржылар халық аралық финанс институтлары ҳәм басқа шөлкемлерден грант тийкарында алыныўы мүмкин.
Фондтың секюритизация менен шуғылланыў искерлигине қымбатлы қағазлар бойынша әмелдеги нызамлар енгизилмейди.
