Кегейлидеги мешит жаңадан қурылмақта
Кегейли районындағы Искендер ҳәм Алаўатдин ийшан мешитиниң имаратын қайта қурыў ушын жоқарғы шөлкемлерден келисим ҳәм рухсат алынды. Мешиттиң бурынғы имараты тозыўы жеткен, сондай-ақ, мешит орайлық асфальт жол бойынан алыста жайласқанлықтан қыстың қыраўлы күнлери мешитке барыў әдеўир машқала туўдырар еди.
Қарақалпақстан мусылманлары қазыяты ҳәм Кегейли районы ҳәкимиятының шөлкемлестириўи менен 9-ноябрь күни усы мешиттиң жаңа имаратының биринши гербишин қойыў мәресими болды. Оған Қарақалпақстан мусылманлары қазыяты қазысы Шамшетдин Бауатдинов, район бас имамы Алматдин Абдираззақов, район ҳәкимияты ўәкиллери ҳәм аўыл ақсақаллары қатнасты.
Қурылыс жумысларына жақыннан жәрдем берген жергиликли қәўендерлер, жумысшы ҳәм қурылысшылар ҳақында дуўалар етти.
Исламатдин Алланов,
Қарақалпақстан мусылманлары қазыяты хызметкери.
