ФУТБОЛ ФЕРЕРАЦИЯСЫ КУБОГИ УШЫН ОЙЫНЛАР БАСЛАНДЫ
14-февраль күни Нөкис олимпиада резервлери колледжиниң футбол стадионында 2004-2005-жыллары туўылған балалар ҳәм жас өспиримлер арасында «Футбол Федерациясы кубоги» ушын футбол жарысы басланды.
Оған республикамыздан 8 команда, яғный Қараөзек, Тақтакөпир, Тақыятас, Хожели, Қанлыкөл районларының, Нөкис олимпиада резервлери колледжи, пайтахтымыздағы 36-санлы улыўма орта билим бериў мектеби ҳәм 1-санлы жас өспиримлер спорт мектеби спортшылары қатнасты.
Жарыстың кейинги ойынларын 24-февраль күни 2003-жылы туўылғанлар арасында усы колледждиң футбол стадионында өткериў режелестирилген.
Cол күни 2002-жыллары туўылғанлар арасында пайтахтымыздағы «Туран» стадионында, 26-февраль күни болса 2001-жылы туўылғанлар арасында усы стадионында жарыслар өткериў режелестирилмекте.
Футбол жарысы Халықаралық футбол федерациясы (ФИФА) қағыйдаларына муўапық өткериледи.
Жарыс қатнасыўшылары 18 ойыншы, 1 тренер ҳәм 1 төрешиден ибарат болады. Жарыс қатнасыўшылары командалардың санына қарай ШЕК таслаў жолы менен анықланады.
Ярым финалда жеңимпаз болған командалар өз-ара финал басқышында ойынға түседи.
Ярым финалда жеңилген команда 3-орын ушын ойнайды.
Жеңимпаз деп табылған командалар Футбол Федерациясы кубоги ҳәм 1-2-3-дәрежели диплом менен сыйлықланады.
Тәрбия СЕЙТНАЗАРОВА,
Қарақалпақстан хабар агентлиги хабаршысы
