Екинши жер жүзилик урыс қатнасыўшыларына ҳәр айда бийпул азық-аўқат ҳәм кийим-кеншек бериледи
Президент қарары тийкарында Екинши жер жүзилик урыс қатнасыўшылары, конслагерлердиңтутқынлары, Ленинград блокадасы ўақтында жумыс ислеген пуқараларға айлық бийпул азық–аўқат өнимлери ҳәм кийим–кеншек, жеке гигиена қураллары бериледи. Бул ҳаққындаТелеграмдағы Davletovuz каналына тийкарланып Daryo.uz хабар бермекте.
Оған муўапық, бир адамға ҳәр айда 3 килограмм ун, 1 килограмм гүриш, 0,5 килограмм гречка, 0,5 килограмм макарон, 1 килограмм сом гөш, 1 килограмм таўық гөши, 0,2 килограмм сарымай, 15 дана мәйек, 1 килограмм қумшекер, 1 литр май, 0,2 килограмм чай, 0,1 туалет сабыны, 0,2 килограмм хожалық сабыны, 0,15 килограмм кир жуўыў унтағы, 8 дана жөргек бериледи.
Сондай-ақ, еркеклерге костюм, куртка, бас кийим, қысқы аяқ кийим, жеңил аяқ кийим, ыссы ишки кийим, бир данадан свитер, сорочка, еки данадан ишки кийим, төрт жуп шулық, ҳаялларға – ыссы көйлек, пальто, қысқы ҳәм жазғы орамал, қысқы аяқ кийим, жеңил аяқ кийим, жеңил көйлек, ыссы ишки кийим, бир данадан свитер, еки данадан ишки кийим, төрт данадан чулки бериледи.
Хабарда жазылыўынша, бул имканиятлар усы жылдың 1-октябрине шекем әмел етеди.
Бул жумыслар «Нураный» қоры тәрепинен әмелге асырылады.
Қарақалпақстан хабар агентлиги
