Әдиллик министрлиги жанындағы Мәмлекетлик хызметлер агентлиги Қарақалпақстан Республикасы басқармасы баслығы тайынланды
Өзбекстан Республикасы Әдиллик министриниң 2018-жыл 17-март күнги 191-шт-санлы буйырығына тийкар Казбек Жумабаевич Артыков Өзбекстан Республикасы Әдиллик министрлиги жанындағы Мәмлекетлик хызметлер агентлиги Қарақалпақстан Республикасы басқармасы баслығы лаўазымына тайынланды.
Казбек Жумабаевич Артыков 1984-жыл 11-декабрь күни Қарақалпақстан Республикасы Тақыятас қаласында туўылған. Мағлыўматы жоқары. 2005-жылда Бердақ атындағы Қарақалпақ мәмлекетлик университетиниң Юридика факультетин тамамлаған.
К.Артыков мийнет искерлигин Қарақалпақстан Республикасы Әдиллик министрлигинде баслаған. 2005-2010-жылларда министрликтиң Шәртнамалы ҳуқықый ислерди қадағалаў бөлиминде ис жүритиўши, бөлим жетекши мәсләҳәтшиси, 2010-2011-жылларда Исбилерменлик ҳуқықларын қорғаў бөлими бас мәсләҳәтшиси, 2011-2012-жылларды Сырт ел инвестициялары ҳәм сырт ел инвестициялары қатнасындағы кәрханаларды ҳуқықый қорғаў бөлими баслығы лаўазымларында жумыс ислеген.
Өзиниң мийнет жолын Қарақалпақстан Республикасы Жоқарғы Кеңесинде даўам еттирип, 2012-2016-жылларда Жоқарғы Кеңес Аппаратының улыўма бөлим жетекши қәнийгеси, 2016-2017-жылларда мәмлекетлик-ҳуқық бөлими бас қәнийгеси, 2017-жылдан 2018-жылдың 16-февраль күнине шекем Қарақалпақстан Республикасы Жоқарғы Кеңес Аппараты комитетлер менен ислеў бөлими нызамлылық, суд-ҳуқық ҳәм пуқаралардың өзин-өзи басқарыў органлары мәселелери бойынша бас қәнийгеси лаўазымларында жумыс ислеген.
Алдын Казбек Жумабаевич Артыков Өзбекстан Республикасы Әдиллик министриниң 2018-жыл 16-февраль күнги 92-шт-санлы буйырығына тийкар Қарақалпақстан Республикасы Әдиллик министриниң орынбасары лаўазымына тайынланған еди.
Дерек: kruz.uz