«Сулыў» автономерлердиң сатылыўы бюджетке неше сумлық пайда келтиргени мәлим болды
«Сулыў» автономерлердиң сатылыўы бюджетке 115 млрд сумнан аслам қаржы келтирди. Бул ҳаққында Spot Өзбекстан Республикасы товар-шийки зат биржасына тийкарланып хабар берди, деп
жазады Қарақалпақстан хабар агентлиги.
Жылдың тек ғана 11 айы даўамында биржа онлайн-аукционы арқалы улыўмалық муғдары 105,7 млрд сум болған 20 778 автономер сатылды. Ҳәр бир келисимниң орташа муғдары 5,1 млн сумды қураған. Декабрьде 2 мыңнан аслам автономерлер 10 млрд сумнан көбирек муғдарда сатылған.
Аукцион арқалы «сулыў» автономерлерди сатыў 2017-жылдың сентябрь айынан басланды. Сол ўақытта жыл жуўмақлары бойынша саўда көлеми 27,6 млрд сумды қураған еди.
Автономерлерди аукционда сатыўдан түсетуғын қаржының 80 проценти мәмлекетлик бюджетке ҳәм 20 проценти – ИИМ Материаллық-техникалық базасын раўажландырыў, хызметкерлерди социаллық жақтан қоллап-қуўатлаў қорына жибериледи.
