Пропискасыз пуқараларды жумысқа қабыллаўдан бас тартыў менен байланыслы әмелиятқа шек қойылады
Өзбекистанда ўақтынша ямаса турақлы пропискасыз пуқараларды жумысқа қабыллаўдан бас тартыў менен байланыслы әмелиятқа шек қойылады. Бул халық додалаўы ушын
жәрияланған 2017-2021-жылларда Өзбекистан Республикасын раўажландырыўдың бес баслы жөнелиси бойынша Ҳәрекетлер стратегиясын «Белсенди исбилерменлик, инновациялық идеялар ҳәм технологияларды қоллап-қуўатлаў жылы»нда әмелге асырыўға байланыслы мәмлекет бағдарламасы жойбарында нәзерде тутылған, деп
хабар бермекте uz24.uz.
Бул илаждан пуқараларды турақлы ҳәм ўақтынша дизимге қойыў (есапқа алыў) тәртибин әпиўайыластырыў, олардың мәмлекет аймағында еркин ҳәрекетлениў ҳәм мийнет ислеў ҳуқықларын тәмийинлеў мақсет етилген. Бул жөнелис бойынша норматив-ҳуқықый ҳүжжетлер жойбарлары 2018-жылдың 1-апрелине шекем ислеп шығылыўы белгиленген.
Ҳүжжетте, сондай-ақ, мийнет қатнасықлары процессинде паспорт қағыйдаларына әмел етпегени ушын жумыс бериўшиниң ҳәкимшилик жуўапкершилигин бийкарлаў, ўақтынша ямаса турақлы пропискасыз яки турған орны бойынша есапта турмастан жасағаны, жасаўға жол қойғаны ушын ҳәкимшилик жаза шараларын жеңиллестириў нәзерде тутылған.
