Өзбекистан пуқаралық процессуал кодексиниң дүзилиси Германия ҳәм Франция тәжирийбеси тийкарында өзгертилди
Өзбекистан Олий Мажлиси Нызамшылық палатасының 19-октябрь күни болып өткен нәўбеттеги жыйналысында депутатлар жаңаланған Пуқаралық процессуал кодекси ҳаққындағы нызам жойбарын биринши оқыўда көрип шықты, деп
хабар берди ЎзА.
Хабар етилиўинше, бул нызам жойбары усы жыл 12-апрельде қабылланған «Судлар ҳаққындағы Өзбекистан Республикасы нызамына, Өзбекистан Республикасының Пуқаралық процессуал ҳәм Хожалық процессуал кодекслерине өзгерислер ҳәм қосымшалар киритиў ҳаққында»ғы нызамның орынланыўын тәмийинлеў мақсетинде Олий Суд тәрепинен таярланған. Айтылыўынша, бул кодекс жойбары еле де қолайлы формада ҳәм логикалық избе-изликте баянланған. Пуқаралық процессуал кодексин таярлаў ўақтында шет ел мәмлекетлериниң, атап айтқанда, Германия, Франция ҳәм бир қатар Ғәрезсиз мәмлекетлер дослық аўқамы еллериниң пуқаралық процессуал нызам ҳүжжетлери үйренип шығылған.