Нөкис аэропортында жазғы мәўсимнен «Ашық аспан» тәртиби әмел етеди
Қарақалпақстанның «Нөкис» халық аралық аэропорты аймағында «Ашық аспан» тәртиби енгизиледи. Бул ҳаққында «Газета.uz» хабар берди.
Тәртиптиң қағыйдаларына бола, ҳаўа транспорты бойынша ҳүкимтлер аралық келисимге муўапық белгиленген шет ел авиакомпаниялар Нөкис аэропортына пәрўаз частоталарын шеклеместен ушыў ҳуқықына ийе.
Бул рейслер «ҳаўа еркинлигиниң» бесинши дәрежеси ҳуқықысыз ҳәм Нөкис аэропортының техникалық имканиятларын есапқа алған ҳалда әмелге асырылыўы керек.
«Ҳаўа еркинлигиниң» бесинши дәрежеси – бир мәмлекет тәрепинен басқа мәмлекетке берилетуғын ҳуқық болып, оған бола, белгиленген тасыўшы жолаўшыларды, почта ҳәм жүклерди шерик-мәмлекет аймағында үшинши мәмлекет ямаса үшинши мәмлекетке жибериў яки түсириў ҳуқықына ийе.
Нөкисте «Ашық аспан» тәртиби Халық аралық ҳаўа транспорты ассоциациясы (IATA) кестесиниң «Жаз-2019» мәўсиминен баслап «Қыс-2021/2022» мәўсими соңына шекем әмел етеди.
Өзбекстан менен ҳаўа қатнаўы тараўында шәртнамалар дүзген шет ел мәмлекетлериниң авиация ҳүкиметлерине дипломатиялық каналлар арқалы Мәмлекет авиация қадағалаўының тийисли билдиргиси жиберилген.
